عشائيــات القـارئ : خالـد الجليــــــل 1432 هــ
السلام عليكم ورحمة الله وبركاته
في احد ايام هذه الايام الماطرة الغابرة والباردة الحارة الربيعية المتفلعجه الخرنبسيسية < جوكم ياعزيزي >
ذكرت ذاك اليوم المتفلعج المتخرنبس حينما كنت اقود السيارة من خلف المقود <<
لحد يتذيكى ويقول اكيد تقود من خلف المقود
لا ترا اقودها وانا في الشنطة احيانًا ماعندي اي مشكلة ومعي ثلة من الاصحاب
مركبهم معي على اساس نزلت المكافأة المضاعفة " فيس يهوجس في سلطان بن فهد "
وانا متحتم عندهم واني لازم اعشيكم في ارهى وافخم مطعم في مدينة الرياض الفاضية جدًا
ومن حيث اننا من سكان حي السويدي الحر الابي العظيم " اللي على فكرة افخم مطعم فيه بوفيه فهد "
قلنا لازم نشد الرحال لشمال الرياض
قرينا دعاء السفر كعادتي يوميًا عند ذهابي لجامعة الامام وتوكلنا على الله ومشينا
ونحن في طريقنا لمدينة شمال الرياض وبعد العديد من كلمات : سكر الدريشه
شغل المكيف .. بردنا طف المكيف .. افتح الدريشه .. دخل غبار سكر الدريشه .. احترينا شغل المكيف
امطرت افتح الدريشه .. واثناء الفتح والتسكير والتشغيل والتطفئة
جلستو اهوجسو .. في مكافأتي المضاعفة العظيمة كيف كنت احلم اني اشتري بها جوال
واسوي عملية ليزك واشتري بها لابتوب اخر موديل واسجل في النادي اللي حولنا واغير كفرات موتري اللي دلت ترقل
وكيف ان الدرعمة مع الاخويا بتبدد فلوسي واحلامي ومخططاتي معها
فكرت ان اتراجع بس وش بيقولون عني اخوياي رخمه ؟ زلابه ؟ مانتب قد كلمتك يا يا يالمخنز ؟
لا لا ماقدر اتراجع في هالوقت بتطيح شخصيتي قدامهم
واثناء هواجيسي والأخذ والعطى مع مخي دهست قطة عالدائري الشمالي !!
ايه نعم دهست قطة !! واثناء تعالى الاصوات داخل الموتر وش ذا اللي دعسناه ياعيال
واقعد التفت على خويي وش ذا اللي دعسناه ؟! انت اللي دعسته لحالك يامفهي انت اللي تسوق
انا وانا قاعد اتصنع اللخمة : اممما انا اللي دعسته انا اللي اقود خلف المقود يعني ؟!
خوينا اللي راكب ورى ينادي بصوت خافت اثناء تلاقطي مع اللي راكب جنبي : فارس .. لقدت دهست قطوة فخاست وماتت
وانا اللي اتصنع الصدمه : متأكد ؟!!
ويرد خويي ايه ياخي دعست امممممها بعد بالكفر اللي تحتي حسيت في عظامها وانت تهرسها هرس لابارك الله فيك
واتصنع الصدمة مرتن اخرى .. وافكر بيني وبين نفسي شوي حسيت انها فرصة ولازم انتهزها
ثمن قلت : ماعاد اقدر صراحة انسدت نفسي
ماقدر آكل بعد مادعست القطوة مدري شلون بقدر اتعايش مع نفسي في السنوات القادمة وانا داهس قطة
واخذ اقرب مخرج واديور للسويدي وانا ساكت متصنع التحطم النفساني ومبسوط في داخلي وفرت مكافأتي العظيمة عشان احقق أحلامي
يوم قربنا للسويدي قلت لاخوياي شباب تصدقون الحمدلله تحسنت نفسيتي واحس اني تجاوزت مرحلة الصدمة
تصدقون بصير اتعايش مع نفسي عادي كني مادعست امممم اممممممم القطوة اللي قبل شوي
الحمدلله انفتحت شهيتي للأكل .. يلا نروح لبوفيه فهد بدق عليه يجهز الاكل
واستمتعت بالاكل وعشيتهم بـ 23ريال فقط
برجر عالصاج وبطاطس ابو ريالين وبارد لكل واحد والحمدلله
الهدف من هالمقدمة اني ابارك لكم المكافئتين اكيد خلاص تحققت كل احلامكم بعدها
بعد هالمقدمة المختصرة جدًا << لاعاد تقدم يرحم والديك
احب اقولكم لاتنسون الاستطلاع ترا صوتكم يهمني اختاروا بدقة وعناية فائقة
وبدون اي مجاملات الله يخليكم .. المجاملات ماراح تفيدني
عشان اطور من نفسي في المرة الجاية للأفضل بإذن الله
#
+++++++++ #
نبدا بالموضوع
طبعًا اللي مشغول او داخل كذا عالسريع ومامعه وقت اقل شي ساعه لقدام يطلع ويرجع وقت ثاني لافضى .. يكون احسن
كل المقاطع هنا من تسجيلي وبدقة ان شاء الله تجوز لكم .. انصحكم بالاستماع بالهيدسيت او الهيدفون
نظام تسمعون التلاوات بسماعات لابتوباتكم المخيسه ما اأيد هالشئ ابد ابد
رفعت المقاطع بثلاث طرق
الاولى : استماع من الفورشيرد
الثانية : تحميل مباشر سريع من الدروب بوكس
الثالثة : يوتيوب مع متابعة للأيات
وانصحكم بالطريقة الثالثة عشان تتفكرون بالايات وتخشعون اكثر وماتشغلون نفسكم بشئ ثاني
نبدا بالعشائيات سـورة
الحــــاقــــة
" جميلة جدًا وخاشعة جدتين
"
سـورة
المـــــلـك
" تنوع عجيييب بالمقامات .. اول مره في عشائية اشوف تنوع بالمقامات بهالشكل
سـورة
البـقــرة 102 - 112
" جميلة وهادية
"
سـورة
الانـعـــام 82 - 94
" صوته كان تعبان ومع ذلك حلوة
"
سـورة
يـونــس 26 - 37
" هذي بعد سورة الانعام بيوم مازال صوته تعبان .. تلاوتة من الدقيقة 2 لنهاية الركعة الاولى جميلة
"
سـورة
الــزمـــــر 65 - 75
" هادية على غير عادات الشيخ لاقرا سورة الزمر
"
سـورة
الانـفــــال 15 - 29
" تلاوة جميلة جدًا تنوع في المقامات وختمها بالقراءة المصرية في اخرها
"
سـورة
الانـفــــال 27 - 40
" حليوة
"
سـورة
الانـفــــال 36 - 54
" تلاوة رمضانية ذكرتنا بتلاوات الجليل في القيام .. جميلة
"
سورة
النساء 114 - 126
" تنوع المقامات مرة اخرى .. مير اخر دقيقة ونص تلاوته عجيبة ومؤثرة جدًا
"
سـورة
المعـــارج (1)
" بالطريقة الحجازية
"
سـورة
المعـــارج (2)
" هادية
"
سـورة
المعـــارج (3)
<< هذي صلاة العشاء امس طازجة
" بالمقام الحزين مؤثرة
"
" في جنبي شويب ماغير يكحكح خرب التسجيل الله يهديه ويعافيه
"
في نهاية الموضوع ارجو الدعاء للقائمين على قناة اليوتيوب
وبإذن الله لو في مقاطع جديدة بتلقونها في القناة ماراح اسوي مواضيع خلاص اعتزلت
ياليت تشتركون فيها وتسوون لايك للفيديوات وتنشرون القناة بين اصحابكم واقاربكم في المسن وكذا
وبعدين تشتهر القناة وكلن يعرفها ثمن ابيع القناة بملايين الملايين << المصري تفكيره في الفلوس !!
لا الصدق ليت تنشرونها والدال عالخير كفاعله
وجزاكم الله كل خير